روتيني الصباحي

انا اول مابصحى من النوم مش بكون شايفة قدامي حرفياً من اول فردتين الشبشب اللي بيتلبسوا عكس بعض لحد.... بس مش زعلانة اوي عموماً دي مش اول مرة اغسل سناني بمعجون الحلاقة بتاع بابا :-D 
الامتحانات عاملة عاميلها و كملت بأني جالي برد شديد ، بصحى من الفجر عشان الحق اليوم من اوله على مارتب الورق بيكون الظهر أذن ! كل ما بص على الساعة بيكون نفسي العقرب يقف يستناني ... امنيات مستحيلة !
مفتقدة الوقفة في البلكونة بسبب الجو البارد بحاول اعوض الموضوع بالشاي بلبن من ورا شباك المطبخ !
العصافير اللي بتصحى من قبلنا و تسعىىفي البرد ده عمرها ما اشتكت او استسلمت ! النعم اللي موجودة كل يوم صبح مش تتعد فعلاً ، قريب جداً بأذن الله كل ده هيتغير اسبوع واحد بس و اخلص امتحانات الترم و أفوق كدة و انفذ كل خططي !
صحابي مسافرين الاقصر و اسوان في اجازة نصف العام لكن والدي رفض سفر و بيات برة البيت و انا وافقته بنية ارضاء الوالدين و عارفة ان ربنا هيعوضني خير قريب :)
ده معناه اجازة لوحدي ، تجربة مختلفة و هتكون حلوة انا عارفة
كفاية رغي ورايا بكة امتحان سيوتكال لاخر مرة في حياتي ، هكمل مذاكرة :-)

أخر حصة لدكتور فكري

امبارح كانت اخر حصة لينا مع دكتور فكري بعد ثلاث ترمات معاه :'(
دكتور فكري مش كان مجرد حد بياخد منا فلوس الكورس و يشرحلنا كلمتين عشان ننجح و خلاص
لأ ، الراجل دة من الناس اللي اثروا في تركيب شخصيتي فعلاً و متأكدة اني مش هقابل شخصية زيه تاني
علمني ازاي ارتب مخي و أفكاري و اذاكر بفهم مش مجرد تقضية واجب ! ازاي تعمل خريطة عقلية و ترتب مخك ادراج و يكون وقت الجد جد فعلاً مش استهتار
دكتور فكري نادراً ماكان بيهزر او يضحك معانا ساعات كتير كنا بنتضايق من ده في الأول و بنكره لكن مجرد ما عقولنا نضجت و عرفنا انه قد ايه بيخاف على مستقبلنا و في عز ماكنا مزنوقين في المذاكرة و متضايقين منه في سنة تالتة ، كان هو مطبق يومين عشان يدينا كل معلومة تفيدنا و وقف يشرحلنا حصة ١٢ ساعة احنا تعبنا و هو لأ رغم انه واقف يشرح و مطلوب منه يسيطر على عدد بملئ المكان
سنتر الجولف و سينما برج التطبقين و مسرح الفن ... الأماكن اللي قضيت فيها معظم وقتي السنتين دول و كنت متضايقة اني بصحى و انزل و اتعب دلوقتي هفتقدها جداً و هفتقد قد اية كانت بتجمعنا و تضمنا في اصعب الأوقات
#بداية_النهاية

«إِنِّي قَدْ رُزِقْتُ حُبَّهَا»"

من يومين قرأت موضوع او مقال طويل عن حياة الرسول (صلى الله عليه و سلم ) مع اهل بيته !
ازاي كده بجد ! ازاي مش عارفين نتعلم اي حاجة من الجمال النبوي الخالص ده ! اية الاخلاق و التسامح دول !
ازاي عاداتنا بتاعت الرجل الشرقي المتشدد اللي بيشكم الست طغت على دينا و اتباعنا لسيرة الرسول في التسامح و الرحمة
احنا نسينا حاجات كتير اوى ! سنة النبي اكبر بكتير من ركعتين بعد الظهر او سواك و سبحة في اليد !
فين التعامل و مراعاة مشاعر الغير و الرفق بالأهل و الحب الخالص !
اشمعنا بننسى الحاجات دي و مش بنتبعها !
أمي دايماً بتقولي ان اللي ربنا بيحبه بيرزقه حد يحبه في الدنيا و يخاف عليه ! ماذا فعلت خديجة رضي الله عنها لتنال حب خير الانام ! ليه بجد منعيش على خطى السيرة النبوية في التعاملات العادية في حياتنا مع الناس اللي بنحبهم او نرجو حبهم !
قبل الشكل و المظهر فيه حاجة اسمها الدين و التعامل و الاحترام ! يعني اللي ممكن يشبهك اليوم بالحمارة على سبيل الهزار كما يقال بكرة هيتعامل معاكي من المنطلق دة لانك فتحتيله مساحة في اتجاة خاطئ بعيد عن دينا و تربيتنا !  و اللي انهاردة هتقلل من صورتك و تتريق عليك هزار بردو بكرة هيتحول لمعايرة ! بجد احنا اللي بنعمل كده في بعض و نرجع نسأل نفسنا ليه علاقتنا مع الناس بتبوظ دايماً!!
امي كلامها دائماً صح !

الأولى على الدفعة

من واقع حظي الرائع ان اسمي هبه ! لأ استنى معايا حضرتك اكيد المشكلة مش في هبه ده اسم جميل اكيد : D
المشكلة ان اسمي هبة احمد و الاولى على دفعتنا لمدة اربع سنوات برده اسمها هبه احمد ، شوف الصدفة سبحان الله :D
و من هنا تبدأ المعاناة يا عزيزي !
عارف يعني اية تقطن في كل لجان الامتحانات بجانب الاولى على الدفعة ! يعني في الوقت اللي بحل فيه السؤال في سطر و بعتبره انجاز يستحق جائزة نوبل ، بلاقيها ماشاء الله داخلة على الصفحة اللي بعدها و بتكتب في الهوامش!
يعنى لما يدوبك اخلص اول سؤال الاقيها طلعت العصير و المولتو و قاعدة تتفرج و تراجع في ورقتها قبل نص الوقت اصلاً !
سيبك من كل ده ! ملناش دعوة يا مهيي :D
لكن يوصل بيا الحال و اتدبس و ادخل معاها الشفوية...لأ...لأ..لأ
حضرتك الدكتورة هبة احمد احمد لما بتدخل الشفوي الدفعة كلها بتتلاشى تدخل معاها لدرجة ان الدكتور اللي بيمتحنا بيصاب بالذهول و بيستسلم لأمر انه يمتحنها وحدها !
دخلت معاها انهاردة ! تخيل الكارثة ... في فرق في القدرات و السرعات و كل حاجة ! :D
بجد انا كنت مبلمة ! البنت الله اكبر عليها بتلقطها من قبل ما تركب جناحات و تطير ! و انا غلبانة مستكينة لو قلت كلمتين على بعض بنزل اصلي ركعتين شكر :D
اليوم عدى على خير ! و اتعلمت الدرس :D متسميش بنتك على اسم الاولى على الدفعة :D

٢٢ سنة !!

مدونتي العزيزة ؛
ثالث عيد ميلاد نقضيه سوياً !
لما كنت صغيرة كنت دايماً بحب الارقام المميزة و انا في المدرسة كنت مستنية سنة ٢٠٠٢ عشان اكتب رقمين و رقمين !
كنت مستنية يكون عندي ١١ سنة كان بالنسبة لي رقم كبير و مميز ! و بيعبر عن آخر سنة ليا في ابتدائي ، و اروح اعدادي مع الناس الكبيرة اللي كنت ببص عليهم من الشباك و اتمنى اكون مكانهم !
لما تميت ١٩ سنة كانت اول مرة اكره الرقم حسيت كأن النهاية قربت و هودع العشرات و ادخل على العشرينات و المسئولية !
٢١ سنة !! كنت حاسة اني مسئولة عن كل حاجة اللي هي و لا حاجة !! بقيت قانونياً راشدة ! لكن هتفرق في حاجة .... توء جداً !
السنة دي عيد ميلادي جه و انتهى من غير ما يسيب جوايا حاجة و لا حب و لا كره و لا انه رقم مميز و هيتكرر مرة واحدة بس ... هدايا ، فلوس ، شغل ، التخرج ، هتجوز امتى بقى ، كبرت و مفروض ابقى مسئولة عن نفسي ، هعمل قائمة بالحاجات اللي عايزة احققها قبل ٢٣ سنة !
ماكل سنة بيكون ليها قايمة بيترحل اكتر من نصها للسنة اللي بعدها ، بعضها بحذفه انه مبقاش من اولوياتي !
من سنة كنت بفكر اتعلم كمانجة و اشتري عصافير و اتعلم السواقة و اطلع رخصة ، البس جيب و ابطل بنطلونات بقى و العك ده !
السنة دي عايزة اتعلم بيانو ! عايزة اربي قطة محتاجة شوية حنية و حد اتفاعل معاه مش احبسه في قفص ! عايزة اتعلم سواقة العجل ، محتاجة حبة حرية و بعد عن الناس شوية و الزحمة ! و لسة عايزة البس جيبات و اشوف نفسي حلوة فيهم و ابعد الاراء السلبية بتاعت الناس عني و اخد قرار و اكون قده و اقدر انفذه !
مش عايزة اجيلك يا مدونتي السنة الجاية و انا لسة مترددة و بغير قرارتي لاني عجزت عن تنفيذها !
اللهم سنة مرت و سنة آتية ارزقني الخير منها و اهديني إلى الصواب !