أمك !!

ليه " تلاقي امك اللي جيبهالك !"
بنعتبرها شتيمة رغم ان امك هي اللي جيباك انت شخصياً !
ليه " انت تربية واحدة ست ، انت تربية امك "
بنعتبرها دليل على عدم التربية رغم ان الام هي اصل التربية و هي شغلتها الاساسية فى الكون ، مين فينا مش شرب من طبع امه و تربيته ليها سواء ولد او بنت ؟!
ليه " أصل ابوها ميت "
دليل على انحلال البنت ، رغم ان فيه بنات امهاتهم كانوا هما اساس اخلاقهم و التزامهم في وقت وجود الاب و انفلاته !
ليه " اسم امك اية ؟! "
اهانة مش سؤال رغم ان الرسول افضل الخلق كان بينادي السيدة خديجة بأسمها !
لو حد عنده اجابة غير اننا مجتمع متناقض و مهين لكل حاجة حلوة لحد ما تختفي يقولي من فضلكم !

اماكن و ذكريات (مكتبة ديوان)

بما ان الاماكن بتدوم و الاشخاص لا تدوم
و عمر ما مكان بتحبه هيكرهك او يبعدك عنه
و اني اكتشفت ان حبي لبعض الاماكن قد فاق حبي لكثيرٍ من الاشخاص ...
هكتب عن كل مكان كان ليا فيه ذكريات حلوة :-)  ذكريات الاماكن تدوم للأبد !
و بما اني هبدأ خلال الاسبوع القادم في امتحانات منتصف الترم ، فسيظل ملجأي الدائم هو كافية مكتبة ديوان
المكان ليس الاروع على الاطلاق لكنه قريب جداً في الوصف من منتجع للهدوء و المذاكرة و الابتعاد عن دوشة العالم الخارجي ... كتب في كل مكان و عامل من جنوب افريقيا يتحدث العربية بفصاحة و بارع في عمل فنجان من القهوة يزود معدل التركيز اضعاف ما كان عليه :-)  بجانب اني تمنيت دوماً ان امتلك فيلا صغيرة بجنينة صغيرة و هذا المكان مطابق تماماً لتلك المواصفات :-) هذا المكان ارتسم فيه حلمي

أول مرة اروح ديوان في الترم الثاني من اعدادي صيدلة اثناء interview لاشتراكي في نبض و اتقبلت الحمدلله في افضل مكان و افضل ناس قابلتهم في حياتي ، كل الخوف و الرهبة من اللقاء و الاسئلة اللي تلاشوا مع دفء و جمال المكان جعلوه هو "المكان الاسفنجة " اللي هيعرف يحتويك اياً كان كمية القلق و الخوف و الارتباك اللي بتصاحبك .
اعتقد اني حتى لما أخلص كلية ، هظل ألجأ له من حين لآخر ... و لما أحدث اولادي مستقبلياً عن ذكريات الكلية أكيد مش هنسى مكتبة ديوان و حبي لها ❤