فيه أمل... اية فيه أمل

بقالي يومين مثلًا معلق معايا جدًا أغنية فيه أمل لفيروز!
الأغنية دي كل حاجة فيها جميل...

في أمل! إيه في أمل

أوقات بيطلع من ملل

وأوقات بيرجع من شي حنين

هو الامل ممكن فعلًا يطلع من الملل أو الحنين أو هما الأتنين سوا... التفكير بيخلينا نفتكر حاجات و أشخاص مروا بحياتنا من فترة و ياخدنا الحنين لاحساس الوحشة أن شخصًا ما أو شيئًا ما واحشنا جدًا... 🎶
ما علينا المهم إن التفكير جه من وجود وقت فراغ أو ملل... و الفرخة و لا البيضة... 🤷
بس المهم إن فيه أمل... فيه دايمًا أمل بالدعاء و بالثقة في ربنا... الدعاء بيغير القدر فاعتقد ده أمل آكتر من أي شيء بس المهم في الثقة ❤️
صحيح... أجمل أغاني فيروز إللي عملتها مع زياد رحباني ف فيه ساعات بحس إن فيه ناس مش كانت هتكمل بنفس النجاح أو اللمعان المبهج غير بتعاونهم مع ناس معينة ربنا حطهم في طريقهم و هما عرفوا يستخدموا ده... بيكملوا بعض فعلًا

ليه علي الحجار ؟!!

ليه علي الحجار إللي أغانيه بتعلق معايا جدًا ؟!
عشان هو مش غنى كلمات أي حد و لا ألحان أي حد و لا صوته زي حد... بغض النظر عن أي شيء تاني يدخل فيه شخصه أو ذاته... ما يعنيني منه ما غنى فقط 🤷
ما يلي الكلمات إللي علقت في دماغي للأبد :)
١- هنا القاهرة : و انا في قلب دوامتك الدايرة بينا... بصرخ بحبك يا أجمل مدينة_ سيد حجاب
٢- ماتمنعوش الصادقين : كل إللي عايشين من البشر من حقهم يقفوا و يكملوا... يمشوا و يتكعبلوا... و يتوهوا أو يوصلوا _ الأبنودي
٣-  في هويد الليل : ده الحب مش سهم طايش... الحب زاد إللي عايش _ سيد حجاب
٤- دور يا زمن : لا الجرح باقي و لا الحياة بتنتهي و لو انتهى يوم... يوم جديد يبتدي _ سيد حجاب

٥- تحت نفس الشمس ( الشهد والدموع) : الحقيقة نار تعيش تحت الرماد... في ضيائها بهتدي لحلم في خيالي و المحبة بتفجر الروح في الجماد و بمحبة قلبي هقدر على الليالي _ سيد حجاب

٦- كناريا : بين رهبة من توهة و توبة برغبة... سددنا دينا و غيرنا اغنى و اغبى _ سيد حجاب

٧- روحي فيكي تروح : إن قلتي وداع انقسم اتنين فارس متمرد على القوانين و أسير مسلم ما بيبوح _ عصام عبدالله 

٨- كل الجروح لها دوا ( مسألة مبدأ) : و الصدق مهما عز... في الأزمة مش ههتز... ساعات يكون كتم الانين اصدق _ الابنودي

٩- زي الهوا : يا ترى إللي بيعيش الزمان إحنا... و لا الزمن هو إللي بيعيشنا _ سيد حجاب 

١٠- عارفة : ليه بتكلم و أحكيلك و أشكيلك همي _ بهاء جاهين 

بشر...

بعد سنوات من جلد الذات.. تدرك أنك لست شيطانًا كما كنت تعتقد أو يراد لك أن تعتقد.. وأنك لم تكن سوى إنسان طبيعي ارتكب بعض الأخطاء.. وأن ذلك الالتزام الأخلاقي الكامل الذي تم الترويج له كشيء قابل للتطبيق بل وسهل الوصول.. ليس سوى مجرد وهم.. وأن المطلوب كان فقط أن تكون لديك نية صادقة بعدم إيذاء الآخرين.. وأنك تبذل ما في وسعك من أجل ذلك..

تاني و تالت و رابع

طيب إنت واحشني جدًا.....
اسفة جدًا على كل وقت مش قضيته معاك...
اسفة على كل مرة زعلتك فيها و قلت حاضر و انا مش مقتنعة...
اسفة على كل مرة سيبت الفطار معاك و نزلت فطرت مع صحابي...
اسفة على كل مرة عملالك شاي بسرعة وحطيت معلقة كاملة سكر بدل نص معلقة...
اسفة على المرات إللي أتأخرت فيها برة البيت و قلقتك فيها...
اسفة على كل مرة موبايلي كان صامت و مش رديت عليك...
انت آكتر حد واحشني في الدنيا... انا مفتقداك جدًا يا والدي العزيز
يارب هو معايا دايمًا في قلبي يا رب و انا بحبك جدًا يا رب... عوضني عوض خير يارب... عوض و ونس خير يا رب... أجبر بخاطري و عوضني يا رب

انهاردة أنا سعيدة!

انهاردة بفضل ربنا الكبير جدًا عليا.. أنا سعيدة!
أخدت أحلى جملتين في حياتي.... ممكن أعيش على الطاقة بتاعتهم سنين قدام والله!
الحمد لله الحمد لله الحمد لله
مديري انهاردة رغم خلافي معاه فالشغل إلا إني لقيته بيقولي بدون مقدمات إنه نفسه بنته تطلع زيي و إنه نفسه يعرف يربي بنته زي ما والدي رباني و إنه كل ما بيشوفني بيدعي لوالدي بالرحمة إنه رباني تربية سليمة بالشكل ده!
دكتور في الماجيستير انهاردة قدام كل الناس قال ليهم يومًا ما هتقولوا انكم درستم في نفس الفصل مع البنت دي و شاور عليا... قال إني حد شاطر و زكي جدًا و إنه بحد اعتقاده عارف إني هكون حد ليه بصمة إن شاء الله
(و كان فضل ربك عليك عظيمًا)
شكرًا يا رب... شكرً  يا والدي إنت أساس كل حاجة حلوة

Missing 2

The little girl kept telling herself... " he will never miss your talks like you do... He will never remember the unique topics that you enjoyed talking about together like nobody else... He will never think about the impossible possibilities like you do fool girl"....
The little girl slept this night with a picture in her mind and a feeling in her heart.... She prayed to wake up in the morning with a clear certainty that she is the only party who catches such feelings and ideas...

Missing!

I miss people who are not here anymore!
I think of them when they mostly forget even my name!
Not attached but just a little part of my heart that keeps good things will always remember their good impact in my life!
Maybe my prayers meet their need... Maybe we meet again one day!

العون يا الله

هو ممكن الواحد بعد كل التعب ده يكون بيسعى في اتجاه خاطئ...
ممكن بعد السهر و المذاكرة و الشغل التقيل ده كله يكون مش في ميزان حسناتي ...
ممكن يكون العمل دنيوي رخيص و مش عارفة استثمر صح لغلاء الآخرة...
بقالي أسبوعين مش بأخد اجازة حتى الجمعة عشان محاضراتي و برجع متأخر عشان بخرج من الشغل على الدبلومة أو بتأخر في الشغل عشان احضر للريفيو الاسبوع الجاي..
منهكة جسديـًا للغاية و بحاول ادفع نفسي إنها تكمل بشكل مش طبيعي بس بتصعب عليا أكون بدفعها في اتجاه خاطئ أكون بنهك طاقتها على حاجة مش تستاهل!
خايفة أكون سيئة... خايفة من ربنا و طالبة عونه في كل خطوة... لو مش فبها صلاح يارب وقفها و وقفني عنها

دوافع...

أهدافي الدنيوية اهيف بكتير من اني اتعلق بها
و ليس لي من دوافع للحياة أكبر من الفوز بالجنة و النجاة من النار...
أي حاجة تانية قدام الهدف ده تبدو بلا معنى فعلًا...
يعني اجتمع بأبي الحبيب في الجنة اشوفه و احضنه و أعيش معاه في نعيم أبدي
اية دافع أهم من ده... يمكن ربنا خلق الموت عشان نسعى في الاتجاة الأبدي ده
محتاجة لطمأنينة إن الفوز وارد و إن النجاة ممكنة... الطمأنينة لن تأتي سوى بالسعي الدائم و تجنب الشر و الشبهات و فعل الخير الكثير...
يارب الجنة و بس يارب ♥️

محاولات فاشلة

كل محاولاتي للهروب من ذكرى وفاة بابا فاشلة جدًا..
بموت نفسي من العياط كل ليلة واصحى أموت العالم الصبح...
قررت أموت نفسي من العياط الليلة عشان ماضعفش بكرة واقدر التماسك قدام الناس...عشان الطبيعي إني اخرج كل الحزن إللي جوايا عشان أقدر أكمل....
والدي إنت وحشتني آكتر من أي حاجة و من أي حد... سنة واحدة خلت بنتك الجميلة الرقيقة بقت جامدة و بتخربش... بتزعق و بتاخد حقها... بتقع و بتقوم تكمل...
سنة واحدة قابلت فيها ناس جميلة جدًا و فقدت فيها ناس كانوا أشباح عابرة و دة مش فقد دي كانت إفاقة للنفس عن قيمة بعض الناس في حياتنا...
انا بحبك جدًا يا والدي و مقدرة جدًا كل حاجة علمهالي و زرعتها فيا و هحافظ عليها و اعلمها لأولادي و اقولهم لولا إرادة الله و قدره كنتم هيكون عندكم أعظم جد في العالم...
الحمدلله على الأخذ و العطاء على السراء و الضراء
ربنا يرحمك يا والدي و ينور قبرك و يجعلك من أهل الجنة و يجمعنا بك على خير

إنجازات ال ٢٥ الصغيرة جدُا

٢٥ سنة... ربع قرن...
ماشي بصراحة مش داخلة اكتب عشان حاجة آكتر من اني بلهي نفسي عن التفكير إن متبقى يومين على أول ذكرى وفاة لبابا... سنة عدت
اكتشفت انهاردة إني تمريني لنفسي الفترة الأخيرة خلاني أعرف ارسم وجه كامل بالقلم الرصاص و  بشكل صحيح... برافو يا بوب

من يومين تقريبًاقابلت الولد إللي كان متقدملي و رفضته من فترة و كان عندي تأنيب ضمير مميت بسببه و سلم عليا و هو مبسوط و قاللي إنه دايمًا بيتشرف إنه أتعرف عليا يومًا ما و طلب مني إني اساعده في امتحان ال GMAT... برافو يا بوب
بدأت في دبلومة ديجيتال ماركيتنج بجانب ال MBA و الحمدلله ماشية بشكل كويس... برافو يا بوب
دخلت المطبخ و حاولت أعمل رز لكن فشلت و عملت بطاطس محمرة  و بانية كانوا حلوين جدًا... مش ليا مستقبل آوي في المطبخ بس برافو برده يا بوب!!!