Happy new year

Just as a proof of starting my new yer wz my best friend :D
My blog you are my bestieee :*

عودٌ أحمدٌ

النهاردة قررت ارجع تاني لأحلامي " حلوة القافية دي :D "
قضيت ساعة من وقتي الثمين ابحث عن المنح الدراسية اللي بتقدمها الجامعات الاجنبية في مجالات الصيدلة عموماً و السيوتكس علي وجه الاخص ! اه مالكم مستغربين ليه سيوتكس مالها السيوتكس اكتر مادة ليها علاقة بالدراسات الصيدلية و كمان يا حضرات مش معني ان قسم السيوتكس في كليتنا مربي لنا الرعب ان المادة سيئة !!! ابداً لا تسيئوا الفهم السيوتكس شئ عميق جداً شوهه ذوات الامراض النفسية امثال دكتورة جيهان و دكتورة اميمة و دكتور محمود و دكتور عبسلام و. ..... بص متعدش يا جيمي من الاخر كلهم الصراحة بتتنقلهم العدوي الدور الثاني فالكلية اكتشف اكتشاف تاريخي هو ان بعض الامراض النفسية تنتقل بمجرد التعيين بهذا القسم !@
ما علينا من هذا الهري نسينا لبة الموضوع !
نتكلم جد شوية انا عندي حلم فعلاً اني اعمل الانسولين لزقات بتقيس السكر و تظبطه فالدم ده حلم فعلاً و الموضوع معقد للغاية لكن املي فالله ثم تعبي و مجهودي كبير جداً  ده بالنسبه لي خطة أ  و بالنسبة لخطة ب اني ادرس في مجال تخفيف الاعراض الجانبية لادوية سرطان الدم و ده موضوع معقد اكتر من اكتشاف العلاج نفسه ! نفسي اشوف البنات بشعرهم و مش مصابين بالغثيان و لا قادرين يتحركوا بعد العلاج و الاولاد محتفظين بنشاطهم ! و الله انا لو قدرت اساهم لو حتي بجزء صغنن في ده هكون اسعد انسانة في الكون :)
ادعولي ياللي متعرفونيش :)

خيالات السيوتيكال

بكرة اول امتحان .... سيوتيكال ... نبتة اتحاد الدور الرابع و الدور الثاني في كليتي العزيزة ... اتضربوا مع بعض في الخلاط و طلعوا هذا الشئ المكروه !
انا بكرة structures. ... و انا برسمهم بحس اني برسم اشخاص معذبة نتيجة هذا العقل المريض اللي مقتنع ان طالب صيدلة لو حفظ هذه الاشكال الهلامية هيقدر يغير العالم .... هما بيضحكوا علي نفسهم ! دماغي بقت سلطة بلدي فاضل سبع ساعات علي الامتحان فقدت قدرتي علي التركيز انا الان في واحدة من اللحظات اللي بيصبح فيها النوم انبل و اجمل شئ فالكون !كل اللي في دماغي دلوقتي مشهد احمد حلمي في فيلم اكس لارج في العزا و هو بيقاوم النوم و بتلقائية شديدة " ربنا ياخدكم كلكم. .. ربنا ياخدكم كلكم "
حسبي الله و نعم الوكيل في الكلية دي

كلمة حلوة و كلمتين

عايزة شيكولاتة # كلمة حلوة # تشجيع ان اللي جاي احسن # حد جميل يكلمني يطمن عليا كل يوم الصبح # ورقة و قلم و الوان و ارسم و اشخبط زي مانا عايزة # طفلة جميلة بتحب البالية و اوصلها لدروسه # حد بيحب يسمع موزارت و بيتهوفن و النقشبندي في نفس ذات الوقت # نتفرج علي افلام كارتون و ناكل فشار و بالليل نختمها بفيلم فرنسي من التسعينات # نشرب شاي بلبن الصبح في البكونة و الهوا الساقع بيضرب في وشنا و يخلينا نبتسم من غير مانقصد # عايزة حد يفهمني …حد واحد بس يا رب يحسسني ان لسه في امل في الدنيا المعفنة دي و يخليني اقدر اكمل :)

هلاوس تالتة صيدلة

طبيعي كل اللي بيحصل دلوقتي طبيعي .…دي مش اكبر مشكلة همر بيها في حياتي … دي مجرد سنة و هتعدي ترم و هيعدي حاجة وقتية كابوس و هصحي منه كمان كام يوم … كمان كام شهر !!!
في ناس قبلي عدوا بنفس اللي انا فيه و نجحوا انا مش اقل من اي حد فيهم … انا محتاجة طاقة ايجابية انا بكره الشخصيات السلبية مش عايزة اكلم حد الاقيه بيعيط عشان مش عارف يذاكر مش عايزة اسمع كلام من امثال "مفيش فايدة" و "كلنا هنسقط يا بيبي " و بلاش بيبي دي بتنرفزنيلما واحدة تنهي بيها كل كلامها  !!
عايزة لون ازرق عايزة اقلام ماركر ملونة فوسفوري! عايزة امل و ثقة بالله ان مش احنا الشخصيات القوية اللي بتفوت فالحديد احنا ماشيين فالدنيا بكرمه و الله العظيم و من غيره ملكناش حتي عافرنا و نزلنا من بطون امهاتنا من اول يوم شقى و رحمته بس اللي مخليانا عارفين نكمل لقدام :) بس كده ادعولي ياللي متعرفونيش :)

اخر يوم عملي - ثالثة صيدلة

انهاردة تم بحمد الله الانتهاء من عملي الترم الاول
و كان ختام محسوم بالسيوتكس :D & if u know me from the last posts ; ceutix is a big deal
ما علينا من الرغي ده المهم اني دخلت انهارده مع اصحابي فيلم interseller ! ايه العبقرية و الجمال ده انا كنت حاسة اني عايشة جوه الفيلم كل التفاصيل الدقيقة بتخليك تدخل عالم تاني ! الفيلم من احسن الافلام اللي اتفرجت عليها في حياتي !
و جدير بالذكر ان همسة صديقتي توقعت جزء هام من الاحداث و ده في حد ذاته عبقرية تحسب لها :D
اليوم في مجمله كان مليئ بدرجات عالية من الانشكاح و الخروج من موود كآبة الامتحانات و الكلية !
و لكن هيهات يا ولدي ان تدوم تلك السعادة و انت طالب صيدلة ; فمجرد ماروحت البيت و اخدت قيلولة ست سبع ساعات استيقظت علي تلال الورق بتاع النظري اللي منتظرة الوحش الجبار اللي هيخلصها في ست ايام :D
و هنا يستحضرني مشهد من فيلم غبي منه فيه لما طلب منه يجهز شقة و عفش في 30 يوم :D
لنا الله

في مكان ما

Somewhere beyond the sea
Somewhere waitin for me :)
اكيد في شخص ما في هذا الفضاء السرمدي انا فتاة احلامه
بيحلم بكل التفاصيل الصغيرة اللي نفسه نتشاركها سوياً و عارف ازاي يقدر يوصل لعقلي و قلبي و يخليني اسعد انسانة في الدنيا
في ناس بتعيش علي امل انها تقابل الشخص اللي هيغيرها حياتها و بيموتوا قبل ما يلاقوه
انا بحبك جداً اصلاًُ فكرة اني ممكن اكون شاغلة حيز من تفكيرك العميق بيخليني سعيدة بس ايه الرابط اللي ممكن اوصل لحضرتك بيه :)
اللهم ارشدنا الي الصواب و ابعدنا عن الضلال و المعاصي :)

ناس تشبهلنا

من و انا صغيرة كنت بكره اني اكون "عادية"
كنت بكره اكون نسخة مكررة من ناس كتيرة قررت تعيش حياتها ب"عادي... كله عادي" ; حطيت في دماغي ان الكلمة دي مرض و كنت كمازلت بادعي ربنا كل يوم " اللهم ابعد عنا حياة العاديين البائسين "
ارجوك لو كنت من الخمسة ستة اللي بيقرأوا الكلام ده _انا عارفة ان العدد ممكن يكون اقل _ ادعي الدعاء ده كل يوم و حاول تكون مختلف علي اد ما ربنا يقدرك ايها المجهول المحبوب :)

نور حياتي

نورهان اختي العزيزة ;
   انتي اجمل حاجة في الدنيا المعفنة دي اللي دايما بتضلم فجأة عشان تديكي فرصة يظهر نورك اللي منورلي حياتي.
مش بطمن غير لما اعرف انك موجودة جنبي ; بالرغم من انك عصبية و انا اكتر شخص انتي بتتعصبي عليه لكن انا مستعدة استحملك حياتي كلها !
عمري ما هزعل منك ; ممكن يكونوا شوية نرفزة و هيمشوا بعيد اول ما تيجي عليا بضحكتك المسكرة :)
انا عايزة اشوفك احسن واحدة في الدنيا و مستعدة اقدملك اي شئ اقدر عليه.
الحب مش لازم ولد وبنت بس !!!! الحب مفهوم اشمل من كده بكتير ; الحب هو اني اغطيكي بليل و اقلق لامتحانك حتى اكتر منك. ... اسمعلك دروسك و انا عندي امتحان تاني يوم و مش لاحقة اخلص. ... اتنرفز عليكي و اصالحك ببوسة الصبح. .. اجيبلك كيكة لعيد ميلادك فتحسسيني اني جبتلك الدنيا كلها ... تستحملي حكاياتي الغبية طول الليل و تشتغليلي منبه ايام الامتحانات .....الحب هو كل الحاجات الصغيرة دي اللي بتحصل من غير تفكير من غير تكلف من القلب و بس من غير مالعقل يلعب اي دور فيها !
ربنا يحفظك ليا يا اجمل حاجة فالدنيا و يوفقك السنة دي يا رب :)

بلاش سهوكة

السهوكة للاسف في الايام الاخيرة اصبحت سمة رئيسية للبنت المصرية !
يعني ببساطة الكلام بيكون من طرطوفة فمها عشان تبان رقيقة و الضحكة مايعة مع استدارة وشها 45 درجة قال يعني بتداري الجمال عن العيون !
الالعن من كل ده يا سيدي هو ماشيتها ; اه و الله ! تحس انها بتحاول تتقمص دور البجعة الام في بالية بحيرة البجع مع الضغط علي اطراف الاصابع الامامية و الاستدارة نصف الدائرية كل شوية لترمقك بنظرات مليانة ايحائات مسهوكة !
ليه بيحولوا يبينوا ان ده نوع من الانوثة او الجمال و للأسف ليه ناس كتير اقتنعت بكده !
ليه نسيوا ان المرأة اكبر بكتير من ضحكة مايعة او ماشية مهزوزة ! فين الرجل الثابتة في الارض كالوتد و الثقة بالنفس اللي مش منتظرة اطراء او كلمة اعجاب عشان تحس باهميتها !

ليه بقوا هم فجأة القاعدة و اصبحنا احنا الشواذ و الاية اتقلبت !
حتي لو كلهم بقوا كدة انا عارفة اني انا اللي صح و متأكدة من كدة و عمري ما هتسهوك ابداً :)

Paris, je t'aime

امبارح حالفني الحظ اني اتفرج علي الفيلم ده ! او خلينا نقول بمعني اخر اني اقع في غرامه !
نال الشرف و اصبح صديقي في سهرتي ليلة امبارح مش بس كدة لكن كمان كان رفيق في احلام تلك الليلة الهادئة :َ)
كل التفاصيل الصغيرة في الفيلم علقت معايا بشكل غريب لكن اكتر قصة أثرت فيا و عجبتني بشكل مذهل هي قصة توماس و فرانسين
الطريقة اللي قالتله بيها الكلام في التليفون مع تعبيرات وجهه في اللحظة دي تستحق بجدارة انها تتوج بنات افكاري لفترة مش قليلة !
انا نفسي اسافر باريس :)

رحيل هادئ

مدونتي العزيزة ;
دعينا نتفق ان نهاية هذا العام كانت الأكثر بؤساً حتى الآن !
فقد تخبطت الأيام متزاحمة تسرق الأحباب و الأناس الأعزاء منا تاركة لنا كل يوم خبر مؤسف أو ظالم لعقولنا التي لم تستوعب المشيئة الآلهية في رحيلهم عنا بينما يظل هؤلاء المزيفون و المجرمون بيننا ليذكرونا كل يوم بالظلم الذي نعيش فيه و يجعلوا من دموعنا نداءاً لرب السماء ان يقتص لكل من رحل من اجل فكرة تستحق ان نكمل مسيرته لنحققها !يكفي هذا الآن فبالأمس زينب مهدي و اليوم رضوى عاشور !
رحم الله تعالى كل من احيا فكرة في نفوسنا ! رحمكم الله جميعاً .