ممكن يكون ده اسوأ شهر فبراير عدى عليا من يوم ما وعيت عالدنيا
الناس بتقول فئراير بس حرام مينفعش نشتم الزمن
بس انا راجعالك مدونتي العزيزة سنة ٢٠٢٥... انتي متخيلة اني بقى عندي ٣١ سنة... احنا كنا لسة بنحتفل بعيد ميلادي العشرين من كام يوم و لما تميت ٢٥ حسيت اني نجمة القرن.
انهاردة انا خايفة... خوف بيزيد لدرجة المرض... انا خايفة من كل حاجة...
اه بالمناسبة السنة دي هبدأ ٣ سنة غربة.
نرجع لموضوع الخوف... خايفة من الوحدة... بالمناسبة برده السنة دي عملت اول محاولة حقن مجهري.. فقدت ٣ اجنة و باقي ليا ٤ على محاولتين فقط...
نرجع تاني للخوف... خايفة من الوحدة... خايفة افقد ناس عزيزة عليا و المشكلة اننا كل ما بنكبر بندرك اكتر اننا هنفقدهم و ان الباقي اقل من اللي راح...
الموضوع رعب و الله...
الدنيا واخداني اوي... خايفة اندم... انا اصلا مقضياها ندم... ادوية التوتر و الاكتئاب مش بتجيب نتيجة على فكرة... الموضوع طلع اعمق من كدة...
دانا جايبة عربية بقالي سنتين و خايفة اسوق لحد ما هتصدي...
بخاف اتكلم مع زوجي لدرجة اننا بقينا زي الغرب كل واحد له حياة منفصلة
بخاف....
و للحديث بقية.
الف سلامة عليك
ReplyDeleteعاوزة اقولك ان الندم عمره ما هيعوض ولا يرجع اللي راح
عشان كدة لازم تتعلمي انك تتخطي كل حاجة عشان تعرفي تعيشي مرتاحة ومتفكريش ف اللي راح فكري ف اللي جاي وخليه احسن
بتمني لك السعادة
تخيلي اني فرحت بتاريخ التدوينة
ReplyDeleteوالتدوينة كلها صعبة بجد
ربنا يسعد قلبك يا رب
مش هقدر اقولك نصائح ممكن تكون تقليدية ومملة مع انها غالبا هي الصح .. لكن حقيقي الإلتجاء إلى الله هو الحل ! لا أبرح حتى أبلغ !
يعني مش همشي من هنا يا رب 🙂😊
أسأل الله العظيم رب العرش العظيم أن يسعدك في الدارين وأن يتولى أمرك .. إن شاء الله اتابع ومش هتكون آخر زيارة