رجعنا تاني لقلق الدراسة و المذاكرة !
النتيجة بتاعتي هتظر خلال ايام قليلة ؛ كوابيس و ما إلى ذلك بترعبني اكتر !
بحاول اهدي نفسي ان دي مجرد نتيجة ترم و ان مش مفروض يكون ده رد فعلي ؛ المفروض اخاف من نتيجة ال ٢١ سنة اللي عشتهم عند ربنا ! تلقائياً الفكرة بتخوفني اكتر و لو كنت مقصرة في المذاكرة قيراط ؛ فأنا مقصرة في العبادة ٢٤ قيراط !!
نتيجة تلات شهور مذاكرة و نتيجة ٢١ سنة لما تحطهم قدام بعض بحس فعلاً ان الدنيا لاهتنا عن كل حاجة ممكن تنجدنا !
الدروس و السكاشن اللي بقوا يخلوني اصلي كتير من الصلوات متأخرة ؛ مُحَفْظة القرآن اللي كل مرة تقولي ركزي وحسني اكتر ؛ الساعتين بتوع كل اسبوع اللي بحفظ فيهم القرآن و اصبحوا ساعة او اقل نتيجة طغيان الدراسة على وقتي !
زيارات دار الايتام و مستشفى اطفال الدمرداش اللي اصبحت مرة واحدة في الترم بعد ما كانت شئ اساسي في حياتي !
التقصير اللي بيحسسك انك مش لازم تبطل تقول الحمدلله على رحمته بينا بعد كل اللي بنعمله ده ! قطعنا من وقت عبادتنا عشان الدنيا الفانية، و سبحان الله الذي لم يقطع من نعمه علينا شيئاً :)
الحمد لله حمداً كثيراً
No comments:
Post a Comment