المساحة الشخصية

انا من الناس اللي مساحتها الشخصية اهم من اي شيئ آخر !
من اول اني بكره الصوت العالي عشان بيخترق الحواجز اللي انا حاطاها للضوضاء البشرية ،
اسوء ايام حياتي لو ركبت مواصلات زحمة مع اشخاص لو همست هيسمعوني لو اتحركت هيلتفتوا لي ،
لو خرجت للبلكونة استمتع بالجو و لاقيت اي حد من الجيران متابعني بنظرات سخيفة ممكن مادخلهاش تاني لمدة اسابيع
لو غيبت فترة عشان اظبط افكاري و اهدافي ، بقدّر الاصحاب اللي بيحترموا ده مش يقرفوني بسؤال "مبتسأليش ليه .؟!"
الفكرة مش بلورة و هقفلها عليا الفكرة اني مش بحب حد يخترق حدودي و مساحتي الشخصية بدون إذن و بدون داعٍ مجرد فضول و رخامة و هو كده !!!!

في لمح البصر

على فكرة ماعدتش بسرعة ، و الوقت ممرش في لمح البصر ، و مش كأني كنت دخلاها أمبارح !
دول خمس سنين ، اكتر من ١٨٠ امتحان لحد دلوقتي و انا لسة ناقصلي امتحانات الترم ده و الترم الجاي ، ده طبعاً غير كويزات قسم السيوتكس و ما شابه !
السهر في الكورسات ، التأخير و التعب ، الجري من الدور الأول للأخير عشان الحق السكشن و مش اتكتب تأخير ، شغل العملي و السيوتكس اللي ممكن نكرر الحاجة مرتين و ثلاثة عشان تطلع مظبوطة !
سكاشن الفارما و الفئران و الصويت و العياط !
كام و عشرين برزينتيشن و بحث و اسيمنت !
رسومات المايكرو و البارا و الكوجنو اللي كانت بتطلع عنينا !
كام مرة كنت بردد انا بكرة الكلية دي و أحسد الناس اللي خلصت و مشيت منها على خير و اتمني اكون مكانهم !
كام مرة دخلت امتحان شفوي و انا مرعوبة اتسأل في جزء مش ذاكرته. ، كام مرة استنينا الدكاترة بتوع الشفوي بالساعة و الساعتين و احنا مطبقين عشان نيجي الامتحان اصلاً !
كام صورة اتاخدت و كان ناقصها حد عشان تعبان  و مش قدر يجيي النهاردة !
كام ورقة اتعلقت و اتجمعنا حوليها عشان نتيجة ميدترم و لا اعلان عن مواعيد الامتحانات !
كام بيوريت اتكسرت و احنا في قلب الامتحان و مش كنا عارفين نعمل اية !
مكنتش سهلة و لا عدت بسرعة ، احنا روحنا طلعت في المكان ده ، الخمس سنين كانوا كتير اوي محدش غيرنا هيحس بيهم ، احنا بنهونها على نفسنا لكنها مش كانت هينة ابداً !

شباك غرفتي

أجد متعة غريبة في ان اطل صباح كل يوم من شباك غرفتي على ذلك المشهد !
برغم من انه الوحيد في بيتنا الذي لا يطل على الشارع الذي يعج بالمارة و حركة السيارات و المدارس ، و رأى الجميع في اسرتي ذلك عيباً ابعدهم عن اختيار تلك الغرفة ، إلا انه ما أهلها لتكون غرفتي :)
أحن للماضي كما لو كنت أعيش فيه ، كما لو انني آتية من زمن آخر ، أختلف عن جميع زملائي المواكبين للعصر !
أعشق البيوت القديمة ، بل أعشق كل ما هو قديم و اتمنى ان اقتنيه يوماً ما !
يوماً ما كان يسكن تلك الفيلا اشخاص عاديون ، تحيط بهم الحديقة بدلاً من اكوام الخردة ! يبدأون يومهم بشرب الشاي في تلك النافذة ثم ينطلقون للخروج مع جيرانهم في الفيلا المجاورة قبل ان تتحول لمجموعة من الأبراج الشاهقة ! كان الجميع يعرف الآخر ، كان الترابط  موجود حتى لو لم يظلل عليه الود!
اليوم أقطن بعمارتي فيما لايقل عن أربع سنوات لا اعرف من الجيران إلا قليلاً !
اشجار شارعنا اكتست باللون الرمادي بدلاً من الأخضر بسبب عوادم السيارات ، و احتل الضجيج و الصياح محل الهدوء بسبب المدارس و حركة السير !
يوماً ما سأخترع آلة تعيدني للوراء حيث اقف في بلكونة تلك الفيلا و انظر إلى شباك غرفتي الموجود من عدم !
دمتم ودودين مع الماضي ، مرفقين بحالنا الحاضر ! دمتم سعداء :)

إلى صديقتي التي لم تعد كذلك

اليوم ليلة اول امتحان عملي في أخر أول ترم دراسي لي في كليتي العزيزة !
تلك الجملة المعقدة تحمل ورائها الكثير من المشاعر الأكثر تعقيداً ،
ما بدأ في هذا المكان (كليتي) و انتهى قبل ان تنتهي هي حتى ... انتهي بدون سابق إنذار ...
و ما بين بداية و نهاية اكتسبت الكثير و خسرت ما هو أكثر ...
اليوم و انا اتصفح الفيس بوك قرأت تلك الجملة في الأعلى
تدافعت دموعي بكاءاً عليها ... على من ظهرت فجأة في حياتي مقدمةً الكثير من الحب و المشاركة في كل شئ ثم قررت هي الاختفاء بدون مبرر حتى، بدون ذنب مني ، غادرتني بدون نقاش ، بدون عتاب و كأن شيئاً لم يكن ... لم تختفي جسدياً بل اصبحت شخص كالأخرين ... و كم اكره هؤلاء الآخرين لكثرتهم و عدم نفعهم !
اصبح السلام و الكلام معدوداً ... تحولت من صديقة ... بل أعز صديقة ... إلى مجرد زميلة ... افتقد وجودها رغم جلوسنا بنفس المكان ... افتقد احاديثي المطولة معها ... أفتقد جنونها و روحها التي تنتشر فتغمرني سعادةً كما لم يفعل غيرها !
أدعي لها بظهر الغيب ان يهدينا إلى الصواب ، فلربما كان البعد بين الأرواح بداية للقاءٍ آخر.

الكرة الزجاجية

أخبرتني و هي على قرب معي انها لم تعد تشعر بوجودي بتةً ... تفتقدني و المسافات بيننا منعدمةٌ ... اتكلم فلا تسمعني؛ فقط شفاه متحركة لم تعد تملأ فراغاتَ الحديثِ بيننا!
أخبرتني انه ذاك الفراغ الذي صنعته حولي منذ فترة ... تلك الكرة الزجاجية التي اغلقتها و اغلقت نفسي بداخلها على ظنٍ مني اني مازلت ارى العالم و اتواصل معه ... و لكنني في الحقيقة كنت اتواصل مع هؤلاء الشخصيات الصامتة التي اخذت النظرات موضع الكلمات !!
أخبرتني بانها ترى كل الشروخ و التصدعات بكرتي الزجاجية ... و تنتظر ان ادفع نفسي خارجها بقوة ... و لكنني انتظر مساعدتها لتحطمها معي و هي تنتظر قوتي على استعادة نفسي !

القلوب الواهية

سلاماً لكل الذين ثووا في الزوايا من القلب و استوطنوا الروح ...

سلاماً على القلوب الواهية التي تركت حطامها في قلوبنا و هي لا تحتمل المزيد ...
سلاماً على الراحلين بدون وداع و الباقيين بدون داعٍ ...
سلاماً علي عين كفنت جيوب دمعها و جفت معها ...
سلاماً على لسانٍ اثقلته كلمات الرجاء للبقاء...
سلاماً على عقلٍ لاذت إليه بنات الافكار فلم تجد لها مأوى ...
سلاماً على روح ايقظها الشوق الكامن لمن رحلوا بعيداً ...
سلاماً لكم اجمعين

من العشرين إلي الثلاثين

العشرينيات و ما ادراك ما العشرينيات!!
ببساطة من العشرين للثلاثين مشوار العشر سنين اللي مش هيتكرروا تاني حياتك ، الحماسة و الصحة و الوقت و التجارب اللي بيعدوا علينا في الفترة دي هم اللي بيبنوا كل حاجة في تفكيرنا عشان كده الناس بتقول انك وصلت لمرحلة النضوج الفكري الكامل لنا تتم الثلاثين
ساعات كتير بخاف من فكرة اني مسئولة عن اختيار كل الامور اللي تخصني ... من بعد العشرين مفيش بابا و ماما و ناخد رأي خالتو و الكلام ده ... انت و بس انت الحاكم و المحكوم ، انت اللي مفروض تحاسب نفسك  انا ليه عملت ده و ليه اخترت ده، كل اختياراتك هتنعكس عليك فيما بعد !
ازاي اعمل حاجة مندمش عليها ؟!
يعني فين الكتالوج بتاع "اعمل الصح"
هل في الفترة دي اوجه تفكيري للجواز و اني ابني اسرة و اكون مدام فلان ؟!
هل افكر اكتر في حاجة مش ممكن اعوضها بعد الثلاثين زي مثلاً اسافر اكمل تعليمي بره او اوجه طاقتي كلها اني اشتغل و اكون انسانة ناجحة في حياتي بحيث لما يكون عندي ثلاثين سنة تكون انجازاتي في الحياة هي اللي بتقودني اني اكمل باقي عمري في مسار معين ؟!
عندي واحد و عشرين سنة و لسة مأخدتش قرار ☺
اللهم اهدنا للصواب و قنا شر انفسنا .

قطع مفقودة

احياناً اشعر في داخلي بالكثير من الفجوات و تبوء إلي نفسي بسؤالٍ غريبٍ :
هل كان الكمال بداية النفس ثم مرت بها من الاحداث و المواقف ما تركها خاوية مليئة بالفجوات هكذا ؟!
ام اننا قد ولِنا بتلك الفجوات في انفسنا ... تلك القطع المفقودة التي قد يمتلكها اشخاص او احداث لم تأتي بعد لتكمل الصورة الداخلية بأنفسنا فنشعر بالكمال ؟!
إذاً هل نملك نحن بدورنا القطع المكملة لغيرنا ؟! ماذا لو حال الزمن بيننا و بينهم ؟!
اللهم لا تجلعنا سبب في حزن آخرين لا ذنب لهم سوى انهم على مقربة منا
اللهم ان النفوس تتلاقى فتكمل بعضها البعض و الكمال لك وحدك يا خالق الكون .

و انت مهتم بأية ؟!

ساعات كتير بنفقد اهتمامنا بأشياء كنا نعتقد اننا هنموت من غيرها ... لكن مع الوقت و مع حدوث مواقف بعينها بننفصل عنها تدريجياً لحد منخرجها من حياتنا !
كل شخص فينا لو راجع نفسه هيلاقي ان اساسيات الحياة بتتغير مع مرور الوقت ! اياً كانت الاسباب و الظروف اللي أدت ان ده بيحصل .. لكنه شئ موجود منقدرش ننكره !
زمان كانت من اهتماماتي اصدقائي لدرجة اني ممكن افضلهم في بعض الاوقات عن اهلي ... من سنتين بالضبط كان التواصل مع الناس من اهم الاشياء اللي بتشغل بالي !
اهتمامي باني اشترك في انشطة في الكلية و اتقدم فيها لمراكز اعلى اصبح حالياً شئ مهمش في حياتي !
اهتمامي بمتابعة الاخبار السياسية و النقاش فيها مع اصحابي ... طبعاً ده ركن فقد مكانه تماماً من حياتي !
و غيره كتير من اشخاص و اماكن و افعال كنت اعتقد انها عادات اصبحت مهمشات للحياة اليومية !
دمتم سعداء :)

أنا مش عايزة ابكي ... مش حاسة ان دي حاجة هتفيده عارفة انه مات في رمضان في ليلة جمعة ليلة فردية من العشرة الأواخر
لكن انا بشر مش هتحمل فراق حد بحبه بدون حزن
خالو كان من اقرب الناس ليا اللي بتفهمني دايماً و بتقف جنبي و بتحبني فعلاً
اصعب حاجة في الدنيا انك تفارق شخص كان حنين عليك
يارب ارحمه و نور قبره. 

Life Vortexes

The vortex of Facebook : when you log in to check out a study group ... Ending up with spending 3 or 4 hours checking others life news !
The vortex of WhatsApp : when you want to ask a friend about some info ... Ending with telling her all your info. !!
The vortex of YouTube : that starts with searching for a missed episode ... Ending with watching " the best audition in Britain's Got Talent " !!
The vortex of Instagram that starts with posting a photo & ending with checking 1000 unrelated photos !!

انا و صيدلة و هواك

بما ان العمر قصير و الكلام كثير ، و الفم واحد و الأذن اثنين ، و المرارة واحدة برده ، و اللي ميشوفش من الغربال يبقى اعمى ؛وكل الحاجات الكتير اللي احنا عارفنها كويس بس بنستعبط و نقول مش واخدين بالنا !
قررت مدونتي العزيزة احدثك عن كليتي اللي مش عزيزة خالص ، بس من منظور مختلف بعض الشئ !
في صيدلة عين شمس ...
بعد الثانوية بيكون احلى يوم في عمرك يوم التنسيق انك تدخل الكلية اللي كنت بتتمناها من و انت عندك عشر سنين !
و فجأة بعد اقل من سنة بيكون احلى يوم في عمرك يوم ماتسيبها !
من اول انها كلية عملية ده في حد ذاته تحدي ؛ انك تلاقي ناس تقولك دانتوا بتاخدوا درجات العملي بالفهلوة !
الفهلوة!!!! هأو !!
ماحضرتك ماجربتش تقف ساعة و نص قدام النار تغلي في شمع و stearic acid و صوابعك تتحرق و في الاخر اول ماتطفي النار كل حاجة تجمد تاني ..  اصل الدنيا برد !!
انك تخسر درجات العلمي كلها عشان ايدك اتهزت و انت بتصب الحاجات اللي بتجهزها بقالك ساعة و طلعت فقاقيع في المحلول و لا اللبوس !
انك تكون مجبر تمسك فار او ضفدعة و تحقنهم و تشوفهم بيموتوا في ايدك عشان تتعلم تدخل الحقنة صح !
انك تقضي ترم كامل بتشم في امونيا و نفتالين لما نفسك يروح !
ولا الend point و تلدقة المطلوبة عشان تنقط براحة من غير ما يجيلك شلل !
و في الآخر يدخل دكتور في محاضرة يقولك انا درست في جامعة في امريكا و المناهج العملية مختلفة تماماً و كل اللي بتعملوه ده مش هتستفادوا منه بحاجة !! و هو اصلاً من اللي حاطين المناهج دي !!!
تقريباً الحافز الوحيد ليا اني اذاكر حالياً هو اني محتاجة بشدة امشي من ذلك المكان المقيت بكل التفاصيل المملة بتاعته !
ملحوظة : الصوؤة المرفقة تصوير sego photography ,لو عندكم وقت زوروا صفحته على الفيس بوك و شوفوا باقي الالبوم 😎😎

عد تنازلي

فاضل يومين على امتحان الclincal pharmacy  العملي
ثلاث ايام على امتحان الdrug design العملي
١٨ يوم على بداية ال finals
٣٩ يوم على رمضان
٥٠ يوم على بداية الاجازة
٦٥ يوم على ظهور النتيجة
١٣٠ يوم تقريباً على بداية سنة رابعة *senior *  بالنسبة لي و اول سنة جامعة لنورهان
١١ شهر على التخرج

يارب على خير يا رب اجعلها ايام كويسة و ابعد حزنك و مقتك عنا يا رب و بلغنا رمضان على خير لا فاقد و لا مفقود .... أمين ☺

درس اليوم

مدونتي العزيزة ً؛
النهاردة قررت اتكلم في موضوع اتعرضت له من فترة و اتكرر معايا اكتر من مرة و طلعت منه بدرس مهم جداً " لا تثق في أحد "
ببساطة الحياة ليست سيئة للغاية و لا عشان الناس كلهم وحشين و لا كل التفكير السودوي ده ، لكن ببساطة لأن الناس بتتغير مع تغير ظروف حياتهم و ممكن يكون نفس الاشخاص اللي كانوا يوماً ما اقرب حد لقلبك ، حالياً هم ابعد عنك ما يكون !
احنا مش ملايكة النقطة السودة اللي في قلبك ممكن تطغي عليك في لحظة فقدت فيها السيطرة على غضبك و من هذا المنطلق توقع انك تقول اي كلمة في الطبيعي كان النقاش فيها مستحيل !
من الآخر صونوا ألسنتكم !

دعوى خلع الحجاب !!

استفزتني جداً الدعاوي التي تم إثارتها مؤخراً بشأن خلع الحجاب ؛ و اللي زاد عليها ان كل شخص من مؤيدي الحملة اصبح مفتي بيطلع آيات و يألف أحاديث عشان يثبت صحة وجهة نظره ! كم من التحريف و المبالغات مش لازم السكوت عليه أبداً ، اين الأزهر الشريف مجمع الدين الوسطي من حملة زي دي !
في الفترة الأخيرة بالفعل بنات كتير اعرفهم اتخلوا عن الحجاب لكن ولا واحدة منهم بادرتني بفتاوى ان الحجاب ليس فريضة ؛ بالعكس النقاش معهم كان دائماً بينتهي انهم رجعوا لورا خطوة عشان يقدروا يتقدموا خطوات او انهم تركوا الحجاب لمن يستحقه و هيلبسوه مرة آخرى لما يحسنوا من حاجات كتير في حياتهم !
و في نفس الفترة الاخيرة دي ؛ عدد اصدقائي اللي اتخلوا عن البنطلون و حسنوا من نفسهم و لبسوا جيبات و طولوا الطرحة ... عدد ليس بقليل ؛ هما مكنوش احسن من البنات اللي قلعت الحجاب لكنهم قرروا يأخدوا خطوة لقدام يمكن هي اللي تحسنهم !
انا مقتنعة اني مش اكتر حد متدين يتكلم بأثباتات دينية ؛ لكني من وجهة نظر شخصية بحاول اطرح سؤال لازم كلنا نفكر فيه ... حتى لا تكوني التالية : لو افترضنا ان الفتاتين اللي قلعت الحجاب و اللي حسنت نفسها و لبست جيبات كانوا على نفس المستوى الديني و الاخلاقي و نفس اللبس السابق (بنطلون و شيميز و طرحة صغيرة ) اية اللي خلى كل واحدة تفكر في اتجاه مختلف ؟؟!
كلمة اخيرة : اللي بيرجع خطوة لورا بيفضل يرجع طول عمره و الخطوة بتصبح خطوات ؛ لم أر فتاة ابداً خلعت الحجاب و عادت لارتدائه مرة اخرى لانها ببساطة تركت مغريات الحياة و الموضة تسيطر على عقلها و نفسها الضعيفة !

البنت التخينة

إلى البنت التخينة ...
اللي الأكل بالنسبة لها متعة من متع الحياة ... حاجة بتخليها مبسوطة لما الناس تضايقها ... رفيق العمراللي عمره ما أتخلى عنها في وقت ما الكل قرر يبعد !
اللي بتدخل محلات الملابس تبص على المقاس اول حاجة ... و قبل اي حاجة و برده مش بتلاقي مقاسها !
اللي بتشوف المليكانات و هما لابسين اللبس اللي نفسها تلبسه و تغمض عينها و تتمنى تكون في جسمهم !
اللي بتبدأ دايت ... بس من بكرة ؛ و بتضعف قدام اول شيكولا او قطعة بانية !
اللي لومها لنفسها تعبها اكتر من كلام الناس !
اللي بتتمنى كل يوم تاخد القرار (يياضة و دايت و دايت و يياضة ) بس بتتعب من اول عشر دقائق على المشاية !
اللي دايماً بتكون جميلة من جواها جمال مش بيشوفه كتير !
انتي حلوة ... انتي احلى منهم كلهم ... احلى حلاوة خليتهم مش عارفين يقدمولك لبس اية عشان انتي مش مليكان بلاستيك انتي روح عايشة في براح مش مخنوقة زيهم ؛ انتي اجمل من كل كلمة ... انتي واثقة من نفسك و عندك امل برغم كل كلامهم ؛ كملي ما تيأسيش :)

لمّا بحلم

لمّا بحلم مش بحلم زي باقي البشر الطبيعين ! حتى الاحلام بحلمهم على طريقتي الخاصة !
في احلامي بحاول اني اخرج كل طاقات الغضب اللي جوايا عشان اقدر اصحى و انا حاسة بسلام نفسي ؛ بجيب الاشخاص اللي مضيقاني و أبدأ اتخانق معاهم و اوبخهم على كل شئ وحش هما عملوه ليا كل الكلام اللي نفسي اقوله ليهم بيطلع ، بقدر اني اتغلب على كل الحواجز اللي موجودة بيننا في الحياة الواقعية و اللي بتمنعني اني اوصلهم و افرغ فيهم تلك الشحنات السلبية !!!
الموضوع مش اني جبانة اني اقول الكلام ده في الواقع و لكن ازاي توصل للشخصيات دي في الواقع في حد ذاته مشكلة مكلبظة فبتحاول تغير الشئ و لو بقلبك !
الشئ الغريب اني اول ما بشوف شخص منهم بحس ان الرسالة وصلتله و انه مش هيضايقني تاني و ده في حد ذاته قمة الهبل :D

النتيجة

رجعنا تاني لقلق الدراسة و المذاكرة !
النتيجة بتاعتي هتظر خلال ايام قليلة ؛ كوابيس و ما إلى ذلك بترعبني اكتر !
بحاول اهدي نفسي ان دي مجرد نتيجة ترم و ان مش مفروض يكون ده رد فعلي ؛ المفروض اخاف من نتيجة ال ٢١ سنة اللي عشتهم عند ربنا ! تلقائياً الفكرة بتخوفني اكتر و لو كنت مقصرة في المذاكرة قيراط ؛ فأنا مقصرة في العبادة ٢٤ قيراط !!
نتيجة تلات شهور مذاكرة و نتيجة ٢١ سنة لما تحطهم قدام بعض بحس فعلاً ان الدنيا لاهتنا عن كل حاجة ممكن تنجدنا !
الدروس و السكاشن اللي بقوا يخلوني اصلي كتير من الصلوات متأخرة ؛ مُحَفْظة القرآن اللي كل مرة تقولي ركزي وحسني اكتر ؛ الساعتين بتوع كل اسبوع اللي بحفظ فيهم القرآن و اصبحوا ساعة او اقل نتيجة طغيان الدراسة على وقتي !
زيارات دار الايتام و مستشفى اطفال الدمرداش اللي اصبحت مرة واحدة في الترم بعد ما كانت شئ اساسي في حياتي !
التقصير اللي بيحسسك انك مش لازم تبطل تقول الحمدلله على رحمته بينا بعد كل اللي بنعمله ده ! قطعنا من وقت عبادتنا عشان الدنيا الفانية، و سبحان الله الذي لم يقطع من نعمه علينا شيئاً :)
الحمد لله حمداً كثيراً

صوت السعادة

تعرف صوت السعادة ؟؟!
اية بالنسبة لك الصوت اللي اول ما تسمعه بتفرح ؟!
سألت نفسي السؤال ده لقيتني بفكر لا ارادياً في اشياء بعينها ،جمعها معاً لا يجعلها متساوية في المكانة طبعاً حاشى لله و لكنها خواطر تستحق الذكر :)
اول صلاة تراويح في رمضان ... صوت المسجد اللي قدام البيت و الشيخ اللي صوته بينور الفجر و يصحي البيوت :)
صوت امي و هي بتضحك ... ده لوحده دنيا تانية :)
النقشبندي في الراديو بعد صلاة الجمعة و الذكريات اللي بفتكرها من بيت جدي !
لما بابا يسمع حفلة ام كلثوم على روتانا كلاسيك و يعلي الصوت و اسمعه و انا باذاكر فانبسط :)
في حاجات تانية اكتر بس دول اول حاجات وردت إلى مخي مع السؤال ده :)
فكروا انتوا كمان ... التفكير في الحاجات دي وحده سعادة ؛)

نوستاليجا

الحاجات الحلوة ... الالوان اللي بتدي لحياتنا معنى... صورتك انت و اخواتك الصغيرين اللي عدى عليها اكتر من عشرين سنة ... هي موجودة عشان تفكرك انكم عشتوا في يوم من الايام في بيت واحد ... في بطن واحدة ... حضن واحد جمعكم يبقى ازاي اي خلاف في الحياة ممكن يفرق بينكم !!
الهدوم القديمة اللي كنت بتلبسها و انت عندك سنتين او تلاتة ... دي الحاجة اللي هتخليك دايماً فاكر انك اد اية كنت صغير لولا تعب اهلك فيك ... انك في يوم كنت اصغر بكتير من انك تستقوى على ضعيف او غلبان !!
الحاجات دي مش مجرد نوستاليجا بتمتعنا بذكرياتنا ... الحاجات دية بتفكرنا ان كل حاجة هتتغير مع الوقت ... بس الشخص الصادق مع نفسه هو اللي مش ينسى اصله كان اية ☺☺

نوستاليجا

الحاجات الحلوة ... الالوان اللي بتدي لحياتنا معنى... صورتك انت و اخواتك الصغيرين اللي عدى عليها اكتر من عشرين سنة ... هي موجودة عشان تفكرك انكم عشتوا في يوم من الايام في بيت واحد ... في بطن واحدة ... حضن واحد جمعكم يبقى ازاي اي خلاف في الحياة ممكن يفرق بينكم !!
الهدوم القديمة اللي كنت بتلبسها و انت عندك سنتين او تلاتة ... دي الحاجة اللي هتخليك دايماً فاكر انك اد اية كنت صغير لولا تعب اهلك فيك ... انك في يوم كنت اصغر بكتير من انك تستقوى على ضعيف او غلبان !!
الحاجات دي مش مجرد نوستاليجا بتمتعنا بذكرياتنا ... الحاجات دية بتفكرنا ان كل حاجة هتتغير مع الوقت ... بس الشخص الصادق مع نفسه هو اللي مش ينسى اصله كان اية ☺☺

اعلانات مبوبة

اعلم ان فترة انقطاعي السابقة قد طالت رغم الامنيات بالا اغيب عن التدوين بعد ان اصبح ملاذي الوحيد من ذلك الجموح الفكري الخانق الذي سيطر على عقلي الفترة الماضية !
الاحداث اليومية فاترة و انا بدوري اصبحت لا اتابع الاخبار ؛الجرائد بالنسبة لي اصبحت اعلانات مبوبة ... كلٌ منهم يجمل بضاعته الممثلة في فكره و يعرضها بصورة تبدو منمقة و لكن في الواقع" الحقيقة فاضحة" !
اقتصرت علاقتي بالتلفاز على بعض الافلام الاجنبية و قناة ناشونال جيوجرافيك بينما اتخبط بين الحين و الآخر بغير قصد اثناء التحويل من قناة لآخرى ببعض البرامج  الحوارية التي اقتصرت حل مشاكل الدولة  على ذلك الخبير العالمي الذي قضى اكثر من نصف حياته في بلاد الفرنجة غير آبه بما آل إليه الوضع هنا !!
اتابع اخبار بعض الصديقات اللاتي التحقوا بمدارس المتفوقين و حققوا انجازات عالمية في ربيع عمرهم ؛ هن الشعلة المضيئة الوحيدة في ذلك الضباب العارم 😊 اتمنى ان اصير يوماً ما من تلك القبيلة العالمة 😊

إلى هدى ٢

مر اكثر من  عامين منذ اخرلقاء لنا ... افتقدك كثيرا ؛ افتقد تلك اللحظات التى شاركناها سويا ؛ هواياتنا التى تفردنا بها عن الباقيين .
مازلت اقرأ لاحمد خالد توفيق .. تساقطت منى بعض اعداد فنتازيا .. اعترف بذلك .. هل تتذكرين ذلك اليوم الذى قررنا فيه انفاق كامل مصروفنا على شراء مجلة ميكي و اعداد ما وراء الطبيعة ؟! افتقد هذه الايام كثيرا !
لم انقطع عن سماع موزارت يوما ، يذكرنى باليوم الذى عزفنا فيه احدى مقطوعاته فى مسابقة المدرسة و حصلنا على المرتبة الاولى ، ثم احتفلنا بطريقتنا الخاصة ؛ بالرقص الغربى على موسيقي القرب الاستكلندية!
اذهب الآن إلى مكتبة " المستقبل " كزيارات منفصلة ، فى كل مرة اتخيل رؤيتك فى تلك الطاولة التى اعتدتى الجلوس عليها ، ذلك الركن الهادئ الذى خلى من كل شئ إلا صخب فكرك.
مازلت احتفظ ببعض الطوابع التى كنا نجمعها سويا، لم اعد اجد من يبادلنى اياها ، فقد اصبحت تلك الهواية عتيقة بالنسبة لعصرنا الحالى !
مازال ذلك الصوت المريب يخبرنى فى كل مرة احاول الاتصال فيها بك ان " الرقم غير موجود بالخدمة " و لكننى اعلم انك موجودة و لكن فقط تغير مكانك من بين الخلق إلى خالقهم .
~ه.ه

الي هدى ١

اشتاق إلي الأحلام المستحيلة !
اشتاق إلي صديقتي هدى التي فارقتني يوم لم تشرق شمسٌ بعده ؛ الضحكات الصافية التي لم تعبأ بشئ من الحياة
الحفلات المنزلية و ملابس جدتها التي عبقت بروائح الزمان و اخذنا منها معاطف أدفئت المشاعر و وهج المراهقة وقتما قل الاحساس بالأمان و الدفء !
من بعدك يا هدى لم اهتدي إلى صداقة ، ادركت معنى الوحشة ... اشمّ رائحة ذكرياتنا في كل يوم يمر علي و لا اسمع صوتك فيه ، اهناك اصعب من لحظات الفراق التي لا نختارها
لا اعلم كيف استقبلت خبر رحيلك عنا ! اؤمن بالله و انكِ في مكان افضل و لكنني بشر يتألم من مجرد ارفاق كلمة موت باحد احبابه ! الكلمة مؤلمة و فراقكِ يكوي القلوب !
لم اجد صديق مثلك ابداً ، رحمكِ الله يا اعز من قابلت في حياتي .

و ماذا بعد ؟؟!

الناس اصبحت معدومة الأخلاق و الضمير في كل مكان من النادر ان تجد شخص يراعي الله في عمله الاخطاء القاتلة. اصبحت اشياء طبيعية و نتداولها و نتحدث عنها كأنها احداث يومية عادية
غابت المعاني في تربيتنا للاطفال فاصبحوا قنابل موقوتة ما ان تكبر حتي ستنتشر في المجتمع بزرع فاسد نحن من انبتناه .
كل شئ اصبح عادياً ، القاعدة اصبحت استثناءات من النادر حدوثها !

و ماذا بعد ان صارت مراكز حفظ القرآن للكبار فقط و افلام السبكي و غيره يشاهدها من هم دون العاشرة ؟!
و ماذا بعد ان اصبح الاحتفال بين الفتيات بخلع الحجاب بدلاً من التقدير على ارتدائه ؟!
و ماذا بعد ان امتلئت المحلات بملابس تكشف اكثر مما تستر ؟!
و ماذا بعد صارت اللغة العربية بلا قيمة و اصبحت المدارس اللغات مقصد كل اولي امر ؟!
فليرحمنا الله و ليجعل من القادم اصلاحا للحالي !

ألسنا أحقاً بقلبٍ سعيد ؟؟!

في الآونة الأخيرة بات يدور بعقلي سؤالٌ لم اجد له اجابة حتى الآن ... ما هي السعادة ؟!
بعيد عن الآراء الفلسفية العميقة و الردود الشخصية ... السعادة شعور مؤقت نتيجة لموقف ما ام حالة من النشوة نستفيق منها على الواقع البائس ؟!
لماذا باتت الكلمة محصور معناها في شخص ما او مكان ما ... او ارتبطت بمفاهيم آخرى اقل عمقاً او بعيدة بعض الشئ عنها ... النجاح سعادة ... الضحك سعادة ... الخ !
لماذا باتت السعادة كائن غريب يطرق ابوابنا متى شاء هو مع أن الأمر بايدينا فنحن احق بقلوب سعيدة 😄😄😄

قلب ايمان

ايمان اختي ...  مش عارفة اوصفها في كلمات لكن اقرب ما يكون للريح الجامدة جدا اللي بتوقع ورق الشجر عشان يجي بعده الربيع يفتح بالورد !!
ايمان اكتر حد ممكن يساعدك تعمل تغيير لاي حاجة وحشة في حياتك و تحفزك ان كل اللي جاي هيكون احسن بكتيير من اللي فات :)
حد كده من بره تحسه بيتخانق مع ذباب وشه لكن من جوه عنده  قلب ابيض مش اتوسخ من عفن الواقع اللي عايشينه !
اسرع حد ممكن يتأثر لو عرفت ان حد تعبان او شخص ما حتى لو مش تعرف مين هوه اتوفى !
ايمان بتفهم الناس بسرعة و الأحسن من كده ان عندها سرعة بديهة تفهم قصد اي حد و ترد عليه رد ساحق ؛)
انا بثق في اراء ايمان حتى لو بنختلف في بعض المواقف لكن حلو انك تحس ان فيه حد في ضهرك و ان مش كان لازم يكون ليا اخ ولد عشان احس بالأمان :) احنا ثلاث بنات بمية راجل الحمدلله :)