كلام ملوش معنى!!

شوية كلام محتاجة ارميهم و امشي أكمل...
الشغف إحساس ملعون... ملقتش وصف ادق من ده ، بسببه حد يقرب وبعد ماينتهي الانبهار الوقتي يبعد...
بيبقي إحساس قذر، سخيف ومؤذي لأبعد حد اللي هو انا مش كفاية ولا ماشيين نجرب في الناس...
بياخد معاه بقى جزء من روحنا و وقتنا ، طاقتنا ،اهتمامنا وانتظارنا للأسف
معلش بقى من فضلك بس انا محتاجة الاجزاء دي مش عارفه أتعامل من غيرها!

ليه تاني...

النهاردة صاحية من الفجر صليت و حاسة ا ن فيه حاجة نقصاني...
كأن فيه حاجة كانت معايا و بقت مش موجودة...
حاسة إني فقدت حاجة مش عارفة اية هي...
إحساس بالفقد... يمكن عشان ذكرى وفاة والدي كمان أسبوع.
يمكن بفقد كل يوم حاجات صغيرة بس انهاردة اتجمعوا...
انهاردة يوم غريب... حلمت حلم مخوفني بس مش فاكرة حاجة منه... صاحية قلبي مقبوض و عايزة أصلي و اعيط جدًا...
بصلي و بقرأ قرآن من الفجر لدلوقتي تقريبًا و لولا إني محتاجة أقوم عشان البس و اروح الشغل كنت كملت صلاة
يمكن ده الشيء الوحيد إللي بيطمني و يطيب على قلبي...
أعتقد ان الصلاة و قرأة القرآن مش واجبات دينية قد ما هما راحة نفسية و هدايا من ربنا للناس التعبانين من الحياة بكل ما فيها...
الحمدلله يارب إنك ساعدتني على ادراك نعمك و إقامتها

كل ده كان ليه...

مدونتي العزيزة
ليان بنت أختي بلغت من العمر سنتين و ثلاث شهور... اتعلمت منذ أسبوعين تقريبًا كلمة ليه!
مرحلة جديدة لها... بتسأل ليه على كل حاجة و اي حاجة...
اشفق عليها لما مش بلاقي أي اجابات مرضية لها فبيصيبها خيبة الامل...
بشفق على نفسي من كلمة ليه...
إللي بحاول اتعلمه الفترة الحالية هو عدم فقدان الامل و اليأس لما منلاقيش اجابات على كمية ( ليه) إللي في حياتي.

Listen to كل ده كان ليه - عبد الوهاب by Hania2 #np on #SoundCloud https://soundcloud.com/hania2/qjhp6akwse54

الست...

مدونتي العزيزة
عارفة إني بصالح العالم كله و بغفرله كل حماقاته و شروره لما بسمع صوت الست و هي بتقول... و عمري ما اشكي من حبه و لو غرامه لوعني.... لوعني!
انهاردة عرفت إن عنيا بتشوف برؤية عقلية مش فعلية... بمعنى إن كل يوم و انا معدية على الاوتستراد و بشوف المدافن كنت بركز في فكرة الموت و الفراق و البعد و الناس القريبين مني إللي مش بقوا موجودين بسبب وفاتهم أو فراقهم ليا 
بس انهاردة و انا على الطريق و بسمع الست و غناها ركزت في الشجر و شكله و وداخل الغصون.. أول مرة أركز أصلًا في جمال الأشجار إللي على الطريق... الأشجار إللي بجانب المدافن... شكل القلعة و. هي منورة الساعة ٧ بليل مفرح و مبهج لاقصى حد!
انا قررت أكون سعيدة... عارفة ان حالة الإحباط إللي مريت بها عزيزتي مش سهلة عليا... انا بحاول أحافظ على قدر أقدر ارجع به لطبيعتي

ثاني يوم... عزلة!!

الوضع اصبح أسوأ... انطلقت لليوم الثاني بابتسامة عريضة و مرح فازع... كل تلك “صباح الخير"، كل تلك الابتسامات الزائفة سيطرت علي لليوم الثاني...
ارى الكثيرين حولي... و لكنني وحيدة جدًا يا الله!
اراهم اخوياء تمامًا... بينما ارتمى الكون بكل افزاعه داخلي... ارى نفسي ملجأ لأحزان تخصني او تخصهم!
لا علاقة لي بكل ذلك... أريد القليل من العزلة.. و كلما حصلت عليها كلما رأيتهم أشباح... بخار متصاعد ليس له أي معنى سوى ازعاج سكان الادوار العلوية الذين قرروا التخلي عن كل ما هو أرضي و اختاروا العيش مع السماء و النجوم...

يارب.....

عزلة!!

قفلت الفيسبوك... قفلت الماسنجر... مسحت الانستجرام... مسحت تويتر...
حاليًا موبايلي عليه ساوند كلاود و الواتس آب و مدونتي العزيزة فقط...
محتاجة ابعد عن الناس جدًا... محتاجة ابعد عن الضوضاءو الضغط النفسي ده... الحمد لله على كل شيء
حاليًا بدون امتعاض من إرادة و حكمة ربنا... انا في أسوأ حالاتي...
حالة نفسية عمري ما مريت بها قبل كدة...
بعيد حساباتي و بفتكر كل الحاجات اللي حصلتلي خلال ١٢ شهر او اقل..
فكرة التظاهر بالقوة و الثبات أدت لضغط نفسي غريب...
فكرة منع نفسي من الزعل و العياط خلتني حاليًا في حالة سيئة جدًا..
فكرة الفقد و الاشتياق و لوم النفس وصل لاقصى عنفوانه معايا...
بقرأ قرآن بقدر المستطاع و بسمعه تقريبًا طول الوقت... ده تقريبًا الحاجة الوحيدة اللي مخلياني واقفة على رجلي انهاردة...
حرفيًا مش قادرة اسمع اي حد... نفسي اتكلم مع اشخاص بقوا مش موجودين في حياتي... نفسي اتكلم مع بابا... مع حد يفهمني... يفهم ان الموضوع مش عمق و اكتئاب اكتر من انه رغبة في التفكير المطلق في كل اللي بيحصل...
بكلم ربنا... ربنا هو اللي مش هيسيبني يومًا ما... معايا دايمًا...
الطابع البشري للأسف بيحتاج لشخص جانبك...
ربنا بيبعتنا لبعض باهداف معينة...
يارب ...